Matthäus 16

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 15

[21v]

Das 16. Capitel.

¹Die Phariseer zu Jhm traten

Vnd Saduceer, die berathen

Sich hatten, zuversuchen Jhn,

Vnd fodderten aus argem Sin,

Das Er es wolt laßen geschehen,

Ein Zeichen vom hiemel zusehen.

²Aber, Er antworttet, vnd sprach:

Des Abends sprecht Jhr, Ein schön Tag

Wird werdten, denn der Hieml ist rot,

³Des Morgens sprecht Jhr, (habs kein noth):

Eß wird heut Vngewitter sein,

Denn rot vnd trüeb ists hiemels Schein.

Jhr Heuchler, des Hiemels Gestallt

Könnet Jhr Vrtheilen gar baldt,

Köndt Jhr denn nicht Jm vnterscheidt

Die Zeichn auch vrtheyln diser Zeit?

⁴Die böß vnd Ehbrechrische Art,

Suchet ein Zeichn, helt widerpart,

Vnd soll Jhr doch auf diser Erdten,

Gar kein Zeichen gegeben werdten,

Denn das Zeichn Jonas des Propheten,

Vnd Er ließ Sie, Nach disen Reden

All[s]eits stehen, vnd ging darvon,

Das ist allr Heuchler rechter Lohn.

☘

⁸Jhesus zu seinen Jungern sprach:

Jhr Kleingleubigen, Dise Sach

Jch wol versteh: Euch frag Jch noch,

Was Jhr Euch viel bekuhmmert doch,

Das Jhr mit Euch, hieher zukohmmen,

Nicht auch Brod habet mittgenhommen,

[22r]

⁹Vernhemt Jhr noch nichts? Gdenckt Jhr nicht,

Ahn die Funff Brod, vnd solch Geschicht,

Vnter die Funff Tausent? Sagt Ja?

Vnd wieviel Körb, aufhubt Jhr da?

¹⁰Denckt auch nicht ahn die Sieben Brod

Vnter Vier Tausent gtheilt zur noth,

Vnd wieviel Körb Jhr da hubt auf?

¹¹Wie versteht Jhr denn nicht, (merckt drauf)

Das Jch Euch nicht sage vom Brod,

Wenn Jch sage, (halts nicht fur spott)

Hütet Euch fur dem Saurteig sehr

Der Pharseer vnd Saduceer?

¹²Darbey verstundten Sie, das Er

Nicht hatt gesagt Jn seiner Lehr,

Das Sie sich hueten solten fein

Vor dem Saurteig des Brods Jn gmein,

Sondern gemeint, nhur fur der Lehr

Der Phariser, vnd Saduceer.

☘

¹³Jhesus fragt seine Jünger, vnd sprach:

Wer sagen die Leut, Jch Euch frag,

Das des Menschen Sohn sey? ¹⁴Sie sprachen:

Johanß der Teuffer, ettlich sagen

Seystu, die Andern, Elias

Ettlich, du seyst Jeremias,

Oder, sonst Einer der Propheten,

Der vmbher reise Jn den Stedten.

¹⁵Er sprach zu Jhnen, (fragt hirbey)

Wer saget Jhr denn, das Jch sey?

¹⁶Da antworttet Simon Petrus:

Vnd sprach also: Du bist Christus

Des lebendigen Gottes Sohn.

¹⁷Er sprach: Selig bistu Simon

Jonas Sohn. Fleisch vnd Blutes Art,

Hat dir das gar nicht offenbart,

Sondern, der Himlisch Vater mein.

¹⁸Vnd Jch sag dir auch, (gleub mirs fein)

Du bist Petrus, vnd mein Gemein

Wil Jch auf disen Felßn allein

Bawen, vnd die Pforten der Hellen

Sie nicht vberwelttigen söllen.

¹⁹Vnd Jch wil dir auch darbeneben

Des Hiemelreiches Schlüßel geben,

Alles, was du auf Erdt hirvnten

Wirst bindten, Soll auch sein gebundten

[22v]

Im Hiemel, vnd alles, was du

Auf Erdten lösen wirst darzu,

Soll auch Jm Hiemel lose sein.

²⁰Er seinen Jüngern Jn gemein

Verbott, Niemandts zusagen mher,

Das Er Jhesus der Christus wehr.

²¹Von der Zeit ahn, Jhesus anfing

Vnd zeiget seynn Jungern viel ding,

Wie Er weist mit betrübtem Sinn

Gehen gen Jerusalem hin,

Vnd leiden viel grosser Beschwehrn,

Von Eltsten vnd HohenPriestern

Vnd auch von allen Schrifftgelerten,

Vnd noch darzu getödet werdten.

²²Vnd Petrus nahme Jhn zu sich,

Fuhr Jhn ahn, sprach: Was Zeyhstu dich?

Herr schon dein selbst, (fleug diß Gricht)

Das widerfare dir nhür nicht.

²³Aber, Er wand sich vmb, vnd sprach

Zu Petro: Mir gereichts zur schmach,

Satan, von Mir nhür hebe dich,

Du bist Mir hierJnn ergerlich,

Denn du meinst nicht, zu diser frist,

Was Göttlich, sondern Menschlich ist.

²⁴Jhesus zu seinen Jungern sprach:

So Jemand Mir wil folgen nach,

Der verleugne sich selbst willig,

Vnd nheme auch sein Creutz auf sich,

Vnd volge Mir, leid Vnglucke viel.

²⁵Denn wer sein Lebn erhalten wil,

Der wirds verliern, als seys vermewrt.

Wer aber sein Leben verlewrt

Vmb meinet willen, der wirds findten.

²⁶Was hülffs den Menschen, So durch Schindten

Vnd wuchern, Er die gantze Welt

Gewönn, auch all Jhr Guth vnd Geldt,

Vnd nhem doch schadtn an seiner Seel?

Oder, was kan ohn mangl vnd fehl

Der Mensch geben, Guths, oder Böß,

Damit Er sein Seel wider löeß?

☘

⇨ Capitel 17