Jesus Sirach (1581) 4

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 3

[7a]

Das IIII. Capitel.

Ein vernünfftig Mensch / fromm an Ehrn /

Der lehrnet Gotts Wort hertzlich gern /

Vnd wer die weißheit lieb hat / der

Hört gern zu / vnd folgt jrer lehr.

Gleich wie das wassr ein Feuwr lescht /

Den brandt / wenn mans drauff geust / abwescht /

Also tilgt ( nach Tobie lahr )

Das Allmosen die Sünde gar.

Vnd der öberst vergelter Gott /

Wirts nachmals gdencken in der not.

Vnd wird jn auß Barmhertzigkeit /

Erhalten in vnfall vnd leidt.

Mein liebs Kindt / es gebeut auch Gott /

Den Armen laß nicht leiden not /

Vnd sey nicht gegen dem so hart /

Der dürfftig ist / vnd draussen wart.

[7b]

Den Hungerigen veracht nicht /

Wenn er dich vmbs Allmosn anspricht.

Denn dürfftigen betrübe nicht /

Jn seiner Armut / wenn jm gebricht.

Du solt auch seyn deß gutn bescheids /

Daß du nicht machest mehr deß leids /

Einem zuvor betrübten Hertzn /

Behafft mit anfechtung vnd schmertzn.

Verzeug die Gab dem dürfftigen nicht /

( Wie offtmal von dem reichen gschicht )

Deß elenden bitt nit abschlag /

Thu was du kanst / jm nichts versag /

Dein Angsicht wend vom armen nicht /

Wenn hungers not jnen anficht /

Vom dürfftigen / der gegn dir sein hendt

Auffhebt / deine augen nicht wendt.

Auff daß er nicht klag vber dich /

Vnd Gott deinr auch nicht annem sich /

Denn der den Armen hat gemacht /

Erhört sein Gbet zu tag vnd nacht /

Wenn er gegen Gott vber dich /

Mit trawrigem Hertzen beklagt sich.

Sey auch nit zenckisch für Gericht

Wenn dich ein böse Sach anficht.

Vnd halt den Richter Ehrenwert /

Denn Gott der Herr jnen beschert.

Den Armen gern vnd willig hör /

Sein klag mit Schnurren nicht zerstör.

[8a]

Freundlich vnd sanfft / jm antwort gib /

Das bringt dir ehr / groß gunst vnd lieb.

Mit deiner hilff errett den bald /

Welchem geschicht vnbillich gwalt /

Vnd wenn recht vrtheilen solst du /

So sey vnerschrocken hierzu.

Gegen die Waysen halte dich

Wie ein frommer Vatter / gütlich /

Vnd gegen jre Mutter / dich

Halt / wie ein Haußherr bscheidentlich.

So wirstu seyn ( ist zweiffels on )

Wie ein / deß Allerhöchsten Son.

Vnd er wird dich viel lieber hahn /

Denn dich dein Mutter lieben kan.

Die Weißheit erhöhet hirnebn

Jr Kinder / welche jr nachstrebn /

Vnd nimpt die auff / in jre Gmach /

Die sie suchn / vnd ir trachten nach.

Wer sie lieb hat / der hat das lebn /

Auch lieb / welchs jm von Gott ist gebn /

Vnd wer sie fleissig inquirirt /

Derselb gar gross freud haben wird /

Wer fest an jr helt: ( sag ich ) der

Wird auch erlangen grosse ehr.

Vnd was er vornimpt ( doch mit ehrn )

Darzu wird der Herr Glück beschern /

Wer Gottes Wort ehret / der thut

Den rechten Gottesdienst so gut.

[8b]

Vnd wer es lieb hat / denen hat

Der Herr auch lieb / erzeigt jm gnad /

Wer der Weißheit gehorchet fein /

Der kan auch andr leut Lehrer seyn.

Wer sich zu jr helt immerdar /

Der wird sicher wohnen lange Jar.

Wer one falsch ist / der wird sie

Erlangen liederlich allhie /

Vnd seine Nachkommen werden

Gedeyen auff dieser Erden.

Vnd ob sie erstlich anders sich /

Gegn jm stellet gar eusserlich /

Vnd macht jm gleich angst vnd bang /

Wehret es doch nur ein zeitlang /

Mit jrer Ruten prüfet sie /

( Nach dero gewonheit ) alle die /

So jr nachhangn: vnd schlechts versucht /

Ob man wöll folgen jrer Zucht /

Solchs treibt sie an biß sie findt /

Daß er on all falsch sey gesinnt /

Als denn so wird sie zu jm her

Auffm rechten Steg kommen wider /

Vnd jn erfreuwn ( es ist gewiß )

Vnd jm offnbaren jr gheimniß.

Wo er aber in falschem Muth

Befunden wird / hat ers nit gut.

Verlassen wird jn die Weißheit /

Daß er verderbn muß vor der Zeit.

[9a]

Mein liebes Kind / der zeit wol brauch /

Hüt dich vor vnrechtr sache auch /

Vnd scheuw dich nicht / scheuw keine gefahr /

Für dein Seel zubekennen dar /

Was recht / ehrlich / vnd billich sey /

Gott wird dir treuwlich stehen bey.

Denn leichtlich sich man schemen kan /

Daß man gar grosse Sünd thut dran /

Man kan sich schemen auch / daß man

Gnad / ehre / vnd lob hat darvon.

Laß kein Person bewegen dich /

Welch dir etwa mag seyn schädlich /

Laß kein Person abschrecken dich /

Dir zum verderb / vermahne ich /

Sondern das Recht bekenn frey wol /

Wenn man den leuten helffen soll /

Denn durch Bkendtnuß wird die Warheit

Vnd das Recht offenbar allzeit.

Red nicht wider die warheit pur /

Sondern laß den hohn gehen nur

Vbr dich: dieses gescheh so fast /

Wo du in sachen gfeilet hast /

Dich scheme nicht zubkennen bald /

Wo du gefeilet hast manchfalt /

Vnd strebe nicht wider den Strom /

Es bringt dir trefflichen nutz vnd fromm.

Eim Narrn in seiner sach dien nicht /

Laß fahren solchen Bösewicht /

[9b]

Vnd sihe sein Gewalt nit an /

Denn pracht vnd macht nichts schaden kann.

Sondern vertheiding in der not /

Die rechte warheit biß in todt.

So wird der Herre auch für dich

Streiten / vnd siegen ritterlich.

Sey nit wie die / so hoffertglich

Mit hohen worten erbieten sich /

Vnd thun darzu / doch gar nichts mehr /

Sie haben deß ein kleine ehr.

Sey nit ein Löuw in deinem Hauß /

Fürwar groß poltern richt nichts auß.

Jtem sey nit ein Wüterich /

Vngstümm / grausam / vnd wunderlich /

Erzeig dich also / daß dein Gsindt

Dich in sanfftmut gelindt erfindt.

Dein Hand soll nit seyn auffgethan /

Jmmer zunemmen ( einem Mann

Ziempts nit ) vnd zugeschlossen seyn /

Nimmer zugebn: steht auch nit fein.

⇨ Capitel 5