Matthäus 24

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 23

[30v]

Das 24. Capitel.

Jhesus von Tempel ging hinweg,

Vnd seine Junger Jm Gesprech

Tratten zu Jhm, das Sie aus trew

Jhm zeigten des Tempelß Gebew

Jhesus aber zu Jhnen sprach:

Seht Jhr nicht das alles, all tag?

Warlich Jch sag Euch, eß wirdt hie

Nicht ein Stein, wie vhest geich auch sie

Zuhauf gefüget, hart vnd dicht,

Auf dem Andern bleiben, der nicht

Zubrochen werdte, groß vnd klein,

Rund, Jnß Gevierdt, vnd wie sie sein,

Vnd alß Er auf dem Oelberg sas,

Sprachen sein Jünger: Sag vns das,

Wenn wirds geschehen? Vnd Jn gmein,

Welches wird doch das Zeichen sein

Deiner Zukunfft, vnd der Welt Endt?

Jhesus sich zu seynn Jungern wendt,

[31r]

Antworttet, vnd zu Jhnen sprach:

Sehet wol zu, das auf eym̅ tag

Euch nicht etwa Jemand verfüer,

Denn es werdten Zur Vngebüer

Viel kohmen, (Jn den Letzten tagen)

Vnter meinem Nahmen, vnd sagen:

Jch bin Christus: Vnd werdten viel

Verfüeren, durch solche Gottloß spiel.

Jhr werdt hören, Krieg vnd Geschreyh

Von Kriegen, viel vnd mancherley,

Sehet zu, vnd erschrecket nicht.

Das mus zum ersten (Jch bericht)

Alles geschehen, fern vnd nah,

Aber, das Endt ist noch nicht da.

Denn es wirdt ein Volck gwalttigklich

Entböhren vbers ander sich,

Ein Köngreich vbers andr Jm streit.

Pestlentz wirdt sein vnd thewre Zeit,

Vnd hin vnd wider groß Erdtbeben,

Da wirdt sich erst die Noth anheben,

Alß dann werdtn Sie Euch allzumhal

Vberantwortten Jm Trubsal,

Vnd Jhr von alln Völckern auff Erdten

Gar sehr müßet gehaßet werdten

Vmb meins Nhamens willen (Jch sag,)

Vnd alle Tag leiden groß schmach.

Denn viel werdten sich ergern sehr

Vnd anthun alln Spott vnd Vnehr,

Auch sich Jn Wortten, Gberdtn, vnd Thaten

Hassn, vnd vnternandter verrathen.

Vnd werdten sich Jn vornhem Stedten

Erheben viel falsche Propheten,

Vnd werdten verfüeren viel Leut.

Vnd weil teglichen vngeschewt

Vberhandt nhemen wirdt allzeit,

Boßheit vnd Vngerechtigkeit,

Wirdt durch des Bösen Geists Getrieb,

Jn vielen erkalten die Lieb.

Wer aber biß anß Endt beharrt

Der wird selig Jn seiner Fart.

Gepredigt wirdt werdten deßgleich,

Das Euangelium vom Reich

Vber all Völcker (vngezehlt)

Zum Zeugnis Jn der gantzen welt,

Wenn solche ding werdten vernhommen,

Alßdann, so wird das Endte kohmen.

[31v]

Vom Greuel der Verwüstung schwehr,

Prediget der Herr Jhesus mher,

Dröhet, vermahnt, Tröstet darbey,

Darvmb ein Jeder Munder sey.

Er sagt von einem Trubsal gros,

Das werdte manchem thun den Stoß.

Dann von der Welt Anfang, bißher,

Sey keins gewest so gar gefehr,

Vnd fördter auch nicht werdten wirdt.

Vnd wo die Tag nicht abbreuirt,

So würdt kein Mensch selig furwahr,

Abr, vmb der Außerwehlten Schar

Werdten verkürtzet dise Tag,

Darbey meldt der Herr sonst mher Plag.

Wo aber etwa ist ein As

Da sanden sich Adler zum Fras.

Baldt nach dem Trubsal solcher Zeit

(Dahin nhumher nicht ist so weit)

Werdten Sonn vnd Mond (gar verwendt)

Den Schein verliern am Firmament.

Die Stern werdten vom Hiemel falln,

Der Hiemel krefft durch Krachn vnd prallen

Werdten gar starck bewegen sich.

Alßdann werdten gar trawrigklich

Auf Erdten heulen all Geschlecht,

Vnd Jns Hiemels Wolcken Jtzt recht

Sehen kohmen des Menschen Sohn

Aus seinem Hochhimlichen Thron,

Mit grosser Krafft vnd Herrligkeit,

Die wolt zurichten, durch Bescheidt.

Am Feigenbaum sichs leent vnd findt,

Wenn Er vom Safft Bletter gewinnt,

So merckt Jhr dran, vnd es fein wisst,

Das nhu der Sommer nahe ist.

Also, wenn Jhr das alles seht,

Das Eins aufs Ander folgt vnd geht.

So wißet, vnd trett all herfur,

Das es ist nahe fur der Thüer,

Warlich Jch sag Euch, Diß Geschlecht

Wirdt nicht vergehen, (Merckt mich recht)

Biß das diß alles sey geschehen,

Hiemel vnd Erdt werdten vergehen,

[32r]

Aber, Mein wort bleibt ewig stehen,

Vnd werdten niemermher vergehen.

Von dem Tag abr, vnd von der Stundt,

Weiß niemand einen wahren grundt,

Jm Hieml auch nicht die Engelein,

Sondern allein der Vatter Mein.

Drumb wachet, denn Jhr wießet nicht,

Welch Stundt Ewr Herr kommendt einbricht.

⇦ Capitel 25