Matthäus 25

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 24

[32r]

Das 25. Capitel.

¹Denn, Eß wird sein das Hiemelreich

Zehen Jungfrawen nicht vngleich,

Die Jhre Lampen nahmn, an wegen

Ausgingen, Dem Breutgam entgegen.

²Aber, Vnter disen Funff bahren,

Funf Thöricht, vnd funff kluge wahren.

³Die Thörichtn Jhre Lampen Nahmen,

Aber, ohn Öel herbey Sie kahmen,

⁴Die Klugen nhamen Öel, (ohn gam̅pen)

Jn Jhre Gefeßen, sampt Jhrn Lampen,

⁵Da nhu der Breuttigam verzog,

Der Schlaf Sie alle vberwog.

⁶Zu Mitternacht ward ein Geschreyh,

Sihe, der Breutgam kompt herbey,

Geht aus, vnd wandert Jhm entgegen.

⁷Da stundten auf, (kein Wind noch Regen

Sie schewten) dise Jungfrawen all,

Schmückten Jhr Lampn Jn frewdenschall.

⁸Die funf Thörichten aber sprachen

Zun klugen: Nichts können wir machen,

Gebt vnß von Ewrem Öele dar,

Denn vnser Lampn verleschen gar.

⁹Da antwortten Jhnen die Klugen,

Sprachen: Nicht also wird sichs fügen,

Auf das nicht vnß vnd Euch gebrech,

Geht aber hin, auf ewrem weg

Zun Krämern, vnd Jn Ewre Schleuch

Selbsten einkeuffet Öel fur Euch.

¹⁰Vnd da Sie hingiengen zu kauffen,

Da kam der Breutgam mit seym Hauffen,

Vnd welche waren fein bereit

Giengn hienein mit Jhm zur Hochzeit.

[32v]

Vnd bald verschlossen ward die Thüer.

¹¹Zuletzt, da kamen auch darfür

Die Andern Jungfrawen, vnd sprachen:

Herr, thue vns auf, wir sonst verzagen.

¹²Er antworttet aber, vnd spricht:

Warlich, Jch kenne Ewer nicht.

¹³Darvmb, wachet aus hertzens grundt,

Denn Jhr wisst weder Tag noch Stundt,

Jn welcher (Nichts dran dubitirt)

Des Menschen Sohne kohmen wirdt.

¹⁴Das Gleichnis kompt hier auch zur handt,

Von eym Herrn, der zog vber Landt,

Rufft seinen Knechten, Groß vnd Klein,

Thet Jhnen seine Gütter ein

¹⁵Er gab einem, funff Centner schwehr,

Dem Andern zween, (zuwuchern sehr)

Dem dritten Einen, so forth ahn,

Was Jeglicher verwalten kan,

Eym Jeden seym̅ Vermögen nach,

Vnd bald hinweg von dannen zog.

^[16-17]Der Erst vnd Ander sein Pfund nahm,

Vnd noch soviel damit bekahm.

¹⁸Der abr Eynn Centner hatt entpfangen,

Trug zur handtirung keyn̅ verlangen,

Sondern ging hin aus vnbedacht,

Ein Gruben Jn die Erdten macht,

Nahm sich nichts mher drumb ahn, war karg

Vnd seines Herren Geldt verbarg.

¹⁹Vber ein lange Zeit hernach,

Kam der Herr, forscht durch scharffe frag,

Rechenschafft mit seynn Knechten hielt,

Was gwonnen sey, oder verspielt.

^[20/22]Der Erst vnd Ander trattn hinzu:

Sprachn: Herr, die Centner, welche Du

Zu Funff, vnd Zweyn, vnß hast vertrawt,

Damit haben wir fort gebawt,

Vnd Sihe, Ander Funff vnd Zween

Centner, vor deynn Augen hier stehn,

Die wir damit haben gewunnen,

Am Capital ist nichts zerrunnen.

^21/23Darvff der Herr zu Jedem sprach:

Zu Ewer keinem, hab Jch clag,

[33r]

Ey, Du frommer vnd trewer Knecht,

Du hast gehandelt, wohl vnd recht,

Bist vber wenigem getrew

Gewest, (deß Jch mich selbst erfrew)

Vbr viel wil Jch dich setzen fein,

Zu deines Herrn Frewd gehe ein.

²⁴Da kam, vnd auch zum Herren tratt,

Der eynn Centner entpfangen hatt,

Sprach, Herr, Jch wusst, vnd dachte dran,

Das du bist ein sehr harter Mann,

Du schneittest, (hast kein Ruh noch Rasst)

Wohin du nicht geseet hast,

Samlest, da du nicht hast gestrewt,

²⁵Vnd furchtte Mich, Vor dir mich schewt,

Gieng hin, vnd Jn die Erd hienein,

Jch tief Verbarg den Centner dein.

Sihe, da hastu das dein wider.

²⁶Sein Herr zu Jhm sprach zornig bitter:

Du Schalck, vnd fauler Knecht furwar,

Wusstestu mein Gemuet so gar,

²⁷So soltestu mein Geldt eym̅ Mann

Zum Wechßlern haben eingethan,

Hett Jch das Mein, wenn Jch wehr kohmmen,

Mit wucher zu Mir hergenhommen,

²⁸Darvmb, den Faulen Knecht beschembt,

Vnd den Centner gar von Jhm nembt,

Gebts dem, der Zehen Centner hat,

²⁹Denn wer da hat, dem wird aus gnad

Gegeben werdten mherr Gaben,

Vnd wird auch stets die Fulle haben.

Wer aber nicht hat, Deme wird

Auch das, so Er hat, aufferirt

Vnd gnhommen werdtn: Vnd gschicht Jhm recht.

³⁰Vnd werffet den Vnnutzen Knecht

Gar Jn die Finsternis hienein,

Da wird Heuln vnd Zeenklappern sein.

³¹Wenn aber nhu des Menschen Sohn

Wird kohmen aus des Hiemels Thron

Jn seiner Herrligkeit (vernimm)

Vnd all Heilig Engel mit Jhm,

Denn wird Er sitzen zu der Zeit

Auf dem Stul seiner Herrligkeit,

³²Vnd werdten fur Jhm, hie auf Erdten

Alle Völcker versamlet werdten,

[33v]

Vnd Er wird Sie vonandter scheidten,

(Was nicht sein ist, wird Jhn müßn meidten)

Gleich alß ein Hirte schlecht vnd recht,

Die Schaf von Böckn zuscheidten pflegt,

³³Vnd wird die Schaf zu hauff hin stellen,

Zu seiner Rechten Sie gesellen,

Die Böck aber, so vor Jhm stincken,

Wird Er stellen zu seiner Lincken.

³⁴Da wird alßdann der König sagen

Zu denen, die Er hat geschlagen

Zu seiner Rechten: Kompt herein,

Jhr Gsegneten meins Vatters fein,

Ererbt das Reich, so Euch ist weit

Von anbegin der Welt bereytt,

³⁵Denn Hungrig bin gewesen Jch,

Vnd Jhr habet gespeiset mich,

Jch bin durstig geweßn, vnd Jhr

Habt Mich getrenckt mit Wein vnd Bier,

Auch bin Ein Gast gewesen Jch

Vnd Jhr habet beherbergt Mich,

³⁶Nacket vnd blos bin gwesen Jch,

Vnd Jhr habet bekleidet mich

Jch bin kranck gwesen, vnd Jhr habt Mich

Mit Trost besucht mittleidentlich,

Gefangen Jch gewesen bin,

Vnd Jhr seidt zu Mir khomen hin,

³⁷Denn werdten die Gerechten Jhm

Antwortten Jn demütiger stimm:

Herr, wir wießen nicht zubestehen,

Wenn haben wir dich Hungrig gsehen,

Vnd haben dich mit Brod gespeist?

Oder dir sonst gutthat beweist?

Oder durstig, vnd haben dich

Getrencket etwa mildigklich?

³⁸Wenn haben wir dich einen Gast

Gesehen, vnd beherbergt fast?

Oder Nacket, zu einer Zeit,

Vnd haben dich mit Gwandt bekleydt?

³⁹Wenn haben wir (die wir hie stehen)

Dich Kranck oder gfangen gesehen,

Vnd sindt zu dir khomen der Ortthen?

⁴⁰Vnd der König wirdt antwortten,

Vnd zu Jhn sagen: Warlich Jch

Euch sage, waß Jhr mittleidlich

Habt gthan aus gutem hertzen rein

Dem gringstn, vnter den Brüdern mein,

[34r]

Das habt Jhr Mir selbsten gethan,

Jch nhemß auch also von Euch ahn,

⁴¹Dem Andern Theil wird Er auch wincken,

Vnd sagen zu denen zur Lincken.

O Jhr verfluchten, Vngehewr,

Geht hin, von Mir, Jns Ewig Fewer

Das dem Teuffel bereitet ist,

Vnd seynn Engeln, (habts wol gewüsst)

⁴²Jch bin gewesen Hungerig,

Vnd Jhr habt nicht gespeiset Mich,

Auch bin durstig gewesen Jch,

Vnd Jhr habt nicht getrencket mich.

⁴³Jch bin ein Gast gewesen hier,

Vnd Mich habt nicht beherbergt Jhr.

Jch bin Nacket geweßen, Jm Leid,

Vnd Jhr habet Mich nicht bekleydt,

Jch bin gewesen Kranck vnd Gfangen,

Jhr seidt nicht einmhal zu Mir gangen,

Vnd habet mich gar nicht besucht,

Mir noch all Vnglück wol geflucht.

⁴⁴Da werdten Sie antwortten Jhm,

Vnd sagn, (alß gscheh eß Jn eym̅ grimm)

Herr, wenn haben wir gsehen dich

Fast durstig, oder Hungerig,

Odr, einen Gasst, Nacket vnd Kranck,

Oder, Gefangn Jnß Kerckers Stanck,

Vnd haben nicht gedienet Dir?

⁴⁵Denn wirdt Er Jhnen aus Straffgier

Antworttn, vnd sagen ohne scheuch,

Warlich, warlich Jch sage Euch,

Was nicht gethan habt Einem, Jhr,

Vnter disen Geringsten hier,

Das habt Jhr Mir auch nicht gethan,

Drauf wirdt diß Endtvrtheil bestahn,

⁴⁶Vnd Sie werdten allsampt Jn gemein

Gehen Jn die Ewige Pein,

Aber, die Gerechten darneben

Gehen Jn das Ewige Leben.

⇨ Capitel 26