Matthäus 2

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 1

[3v]

Das 2. Capitel.

Da Jhesus nhu geboren war

Zu Bethlehem, So kamen dar

Die Weysen aus dem Morgenlandt.

(Herodes dise Gesst nicht kandt)

Gen Jerusalem, Sprachen fein:

Wo ist das Newgborn Königlein

Der Juden? Wir habn seinen Stern

Jm Morgenlandt gesehen fern,

Vnd wir, Ihn ahnzubethen, sindt

Hieher kohmen, Jn frost vnd windt.

Da das der König Herodes hört,

Erschrack Er, Vnd ward auch bestört

Das gantz Jerusalem, Vnd Lies

Die Hohenpriester, sich gewies,

Vnd SchrifftGelerttn, erforschen wol,

Wo Christus geborn werdten soll?

[4r]
Sie sagten Jhm: zu Bethlhem

Jm Judischen Land seys bequem,

Denn also steh geschrieben gnug,

Durch den Propheten Jn seym Buch:

Du Bethlehem Jm Judischn Land

Mit nichten bist Jm kleinsten Standt,

Vnter den Fursten Juda hier,

Denn aus dir sol noch kohmen Mir,

Der Hertzog, Der ein Herr so frey

Vber mein Volck Israel sey.

Herodes die Weysen berief

Heimlich, vnd Er mit vleiß gar tief

Von Jhnen lernt, sprach: Sagt mirs her,

wenn doch der Stern erschienen wehr?

Vnd weiset Sie gen Bethlehem,

Sprach, ziehet hin, forschet genhem

Vnd vleissig nach dem Kindelein,

Vnd wenn Ihrs findet, Kompt herein,

Vnd sagt mis wider, das auch Jch

Komm, vnd eß anbethe hertzlich.

Sie zogen hin, Er lies Sie gehen.

Vnd der Stern, den Sie hatten gsehen,

Jm Morgenland, fur Jhn hingieng,

Biß das Er kam (war wunder ding)

Vnd stundt oben vber, ganz clar

Da eben dises Kindlein war,

Da Sie den Stern sahen erneut,

Da wardten Sie sehr hoch erfrewt,

Vnd giengen Jn das Hauß hienein,

Vnd fundten darjnn das Kindlein,

Mit Maria der Mutter sein,

fieln nieder, bettens ahn so fein.

Jhm, Goldt, Weyrauch vnd Myrrhen schencken.

Gott Ihnn befahl, Sich nicht zulencken

wider zu Herodes verwogen,

Eyn andrn weg Sie Jn Jhr Land zogen.

Da Sie hinweg warn, Da erschein

Des Herrn Engel dem Joseph fein,

Jm Traum, vnd sprach: Steh auf, ghorch Mir,

Nimbß Kindt, vnd sein Mutter zu Dir,

Fleuch Jn Egyptenland, vnd Ja,

Biß Jch dir sage, bleib alda.

[4v]
Denn furhandtn ist ein falscher Trug,

Das Herodes das Kindlein such,

daßelbe Mördrisch vmbzubringen,

Es sol Jhm aber nicht gelingen.

Vnd Er stundt auf, gehorsamblich,

Vnd nham das Kindlein baldt zu sich

Vnd seine Mutter, bey der Nacht,

Sich auf den Weg mit Jhnen macht,

Vnd entweich Jn EgyptenLand,

Vnd blieb alda, (fast vnbekandt)

Biß nach Königs Herodes Todt,

Da Gott zusterbn Ihm fort gepott,

Auff das erfullt wurdt Jn der That,

Das wort, so der Herr gsaget hat,

Durch den Propheten, der da spricht,

Vnd hievon gibt disen Bericht:

Jch hab meinen Sohn (den Geliebten)

Fern her geruffen aus Egypten.

Da nhu Herodes sah, das Er

Von den Weysen betrogen wehr,

Ward Er sehr Zornig, vnd schickt aus,

Vnd ließ wüttrisch von hauß zu Haus,

Zu Bethlehen all Kinder tödten

Sie aufspiessen, alß seyens Kröten,

Vnd keins, ahn Ihrn gantz Grentzen, sparen,

Die zwey Jhärig vnd drunter waren,

Nach der Zeit, die Er hatt mit fleiß

Von Weyßn erlernt listiger weis.

Da ist erfüllt, das gsaget ist,

Von Jeremia, da man liesst:

Auff dem Gebirge, früe vnd spat,

Man ein Geschreyh gehöret hat.

Klagens, Weinens, vnd Heulens viel,

Rahel beweint, ohn mas vnd Ziel,

Ihre Kinder, vnd wolt sich nicht

(Wie noch bißweiln von Eltern gschicht)

Trösten lassen, denn gantz vnd gar

Eß nhumher aus mit Jhnen wahr.

Da abr Herodes gstorben wahr,

Sihe, des Herrn Engl, offenbar,

Dem Joseph Jm Traume erschein

Jn EgyptenLand, vnd sprach fein:

Steh auf, vnd nimm das Kindlein hier

Vnd seine Mutter auch, zu dir,

Aus diser Gegendt wider fleuch,

Vnd Jns Land Israel hinzeuch,

[5r] Sie sindt gestorben, vnd verschwundten, die dem Kindt nach dem Leben stundten. Vnd Er stundt auf, das Kindlein nahm vnd sein Mutter, zu sich, vnd kahm Jn das Land Israel zu rück. Da Er abr hört (schawt mher Vnglück) Das Archelaus König war Jm Judischn Land, (Er bsorgt gefahr) An seins Vatters Herodis statt, Vnd Ihme succediret hatt, Furchtet Er sich Jn seinem sinn, Vnd wolte nicht gern kohmen hin, Vnd Er (In diser furcht vnd noth) Jm Traum befehl empfing von Gott, Vnd Jn die Örtter, (sich verkroch) Des Galileischen Landts zog, Vnd kam, vnd wohnet Jn der Stadt, Die Nazareth zum Nahmen hat. Auf das erfullt würdt, (wie man liesst) Das da warhaftig gesagt ist, Durch die Propheten, recht vnd wol Er Nazarenus heißen sol.

⇨ Capitel 3