Matthäus 3

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 2

[5r]

Das 3. Capitel.

Zu der Zeit kam Johannes her

Der Teuffer, Predigt ein New Lehr,

Jnr Wüsten des Judischen Lands,

Ein scharffer Prediger seins Standts.

Vnd sprach: Thut Bueße allzugleich,

Dann, Nahe ist das Hiemelreich

Herbeykohmen. Und Er ist der,

Von dem, vor soviel Jharen her,

Der Prophet Jesaias hat

Gesaget, nachs Herrn Willn vnd Rath,

Mit den worttn: Es ist eine Stimm

Eins Predigers (Welt, diß vernimm)

In der Wüesten, (seid Ja nicht treg)

Bereittet dem Herren den Weg,

Nempts Ja aus Hertzens grundt Jn achtt,

Vnd seine Steige richttig macht.

Johannes aber hatt ein Kleyd

Von Kamelsharen, vnd sehr breit

Ein Leddern Buetel, vmb sein Lenden,

Darbey die leute Jhn erkendten,

Sein Speise aber gantz vnd gar

Hewschrecken vnd Wild Honig war.

[5v]

Da gieng hienaus, vnd zu Jhm trat

Jerusalem die gantze Stadt,

Vnd das gantze Judische Land

Zu Jhme kam, herbey sich fandt,

Vnd alle Ländr an dem Jordan,

Vnd ließen sich von Ihm (Johann)

Tauffen Jm Jordan, vnd bekandten

Jhre Begangne Sündt vnd Schandten.

Alß Er nhu sahe kohmen her,

Zur Tauffe, viel Phaniseer

Vnd Saduceer, da sprach Er

Zu Jhnen: Jhr Ottergzicht, wer

Hat Euch geweiset dann, das Jhr

Dem kunfftign Zorn vnd Straf alhier

Entrinnen werdet? Sehet zu,

Ein Jeder rechtschaffne frücht thu

Der Buße: Dencket auch nhur nicht,

Jhr habt hirmit all sach verrichtt,

Das Jhr bey Euch wolt sagen, Ja,

Wir habn zum Vattr, Abraham da.

Denn Jch Euch Jn der Warheit sag,

Dem Abraham Gott wol vermag,

Aus disen Steinen, gros vnd klein,

Kinder zurwecken Jn gemein,

Es ist die Axt schon rundt vnd schlecht

Den Beumn an die Wurtzel gelegt,

Drumb höret, wie mein Predigt klingt,

Welcher Baum nicht gut Früchte bringt,

Wird abgehawen, vnd Jnß Fewr

Geworffen, da wirdts Lachen thewr.

Jch Euch mit einem Waßerguß

Teuffe (Seht zu vnd gleubts) zur Bueß,

Der aber nach Mir kömpt kurtzlich,

Der ist noch viel stercker, denen Ich,

Deme Jch auch nicht bin genug,

Jhm nachzutragen seine Schuch,

Der wird Euch mit dem Heylgen Geist

Vnd mit fewer teuffen allermeist.

Vnd Er seine Worffschauffel hat

Jnr Hand, Er wirdet mit Vngnad

Sein Thenn fegen, den Weitzen fein

Hinsanden Jn die Schewne sein,

[6r]

Die Sprew abr, wird Er vngehewr

Verbrennen mit ewigem Fewr,

Zu der Zeit, kam Jhesus heran

Aus Galilea ahnn Jordan,

Zu Johanne, freywilligklich

Das Er von Jhm lies teuffen sich.

Johannes abr Jhm wehrt, vnd sprach:

Jch selbst bedarff wol gleicher Sach,

Das Jch getaufft werdte von dir,

Vnd du kömest anher zu Mir?

Jhesus antworttet aber fein,

Vnd sprach zu Jhm. Laß Jzt so sein,

Also gebüerts vns diser Zeit

Zurfüllen all Gerechtigkeit,

Da lies Ers Jhm zu, gantz vnd gar.

Vnd da nhu Jhesus getaufft war,

Er aus dem Waßer frisch vnd kaldt,

Widrumb herauffer steige baldt,

Vnd Sihe, da thet vbr Jhm sich

Der Hiemel clar auf, sichtbarlich.

Vnd Johannes mit Augen sah

Den Geist Gotts herab fahrn alda,

Gleich, als ein Taube, hubsch am schein,

Vnd vber Jhme kohmen fein.

Vnd Siehe, als nhür diß geschach,

Vom Hiemel herab ein Stimme sprach:

Deß ist mein Lieber Sohn, an dem

Jch wolgfalln hab, Jst mir genehm.

⇨ Capitel 4