Matthäus 10

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 9

[13v]

Das 10. Capitel.

¹Er rieff sein Zwölff Jünger zu sich,

Vnd gab Jhnen Macht krefftigklich

Vber die Vnsaubern Geister,

Zu sein vnd bleiben Jhrn Meister,

Das Sie dieselben trieben aus,

(Das offnbar würdt Jhr Grimm vnd <G>raus)

Vnd heiletten ohn vnterscheidt

Allerley Seuche vnd Kranckheit.

²Der Zwölff Aposteln Nahmen sindt

Dise, wie mans hernacher findt,

Der Erst Simon, Petrus genandt,

Andreas sein Bruder bekandt,

Jacobus Zebedej Sohn,

Johannes sein Bruder, Vnd nhun

³Philippus, Bartholomeus,

Thomas, der Zollner Mattheus.

Jacobus des Alphej Sohn,

Nach dem, folgt Jn der Ordnung schon,

Der fromme Judas Lebbeus

Mit dem Zunhamen Thaddeus,

⁴Simon von Cana. Vnd (ist spott)

Der Schalck Judas Jscharioth,

Welchr Jhn verriethe bey der Nacht,

Vnd Jn den Todt am Creutze bracht,

⁵Dise Zwöffe, Jhesus aussandt,

Zupredigen Jn allem Landt,

Gebotth Jhnen, Zuthun vnd Lassen,

Sprach: Geht nicht auf der Heyden Straßen,

Zieht nicht Jnr Samariter Stedt,

⁶Hin zun Verlornen Schafen geht

Aus dem Hause Jsrael schlecht.

⁷Geht abr, vnd prediget, vnd sprecht:

[14r]

Das Hiemelreich ist nah herbey

Kohmen, das eß eins Jeden sey,

⁸Die Krancken macht gesundt vnd rein

Die mit Außatz behafftet sein.

Weckt Todten auf, Heilet die Lahmen,

Treibt Teuffel aus, Jn meinem Nahmen,

Jhr habet es vmb sonst entpfangen,

Vmb sonst gebts auch, ohn all betrangen,

Sie weitter Jm Ampt instruirt,

Vnd zu dem Creutz vhest confirmirt.

☘

²⁸Furchtet Euch nicht, Jn ewern Nöthen,

Fur denen, die den Leibe tödten,

Vnd es doch nicht können verfügen,

Das Sie die Seele tödten mügen.

Furchtet abr Euch fur dem viel mher,

Der Leib vnd Seele hart vnd schwehr

Jn der Helle verderben mag.

²⁹Keufft man nicht zween Sperling (Ich frag)

Vmb eynn Pfennig, ein gringes geldt?

Noch der Keinr auf die Erdten fellt

Ohn Ewern Vattr, Jst gwießlich wahr,

³⁰Nhu aber sindt auch Ewre Haar

Alle gezehlet auff dem Heupt,

Keins fellt heraber vnerlaubt,

³¹Drumb fürchtt Euch nicht, Seidt guter Ding,

Jhr seidt beßer denn viel Sperling.

³²Darvmb, wer fur den Menschen Mich

Bekenndt, den wil bekennen Jch

Fur dem Himlischen Vatter mein,

O ewig wird der selig sein.

³³Aber, wer fur den Menschen Mich

Verleugenet, den wil auch Jch

Verleugnen fur dem Vatter mein,

O Ewig, der verdampt wirdt sein.

³⁴Jhr sollet nicht wehnen darbey,

Das Jch zu dem Endt kohmen sey,

Auff Erdten Fried zusendtn, Jch bin

Nicht kohmen, Fried zusendten hin,

Sondern das Schwerdt: ³⁵Denn Jch bin kohmen,

Den Menschen, (Bösn, wider Frommen)

Wider seynn Vatter zuerregen

Vnd auch die Dochter zubewegen

Widr Jhre Mutter, vnd die Schnur

Widr Jhre Schwigr, Jn gleicher spur,

[14v]

³⁶Vnds Menschen Feindt werdte Jn gemein

Sein eignr haußgenoßen sein.

³⁷Wer Vattr vnd Mutter liebet mher

Denn Mich, Jst mein nicht werth. Vnd wer

Sohn vnd Döchter mher liebt, denn mich,

Der ist mein nicht werth ewigklich.

³⁸Vnd wer nicht sein Creutz nimpt auf sich,

Vnd Volget Mir nach, willigklich,

Der ist mein nicht werth. ³⁹Wer sein Leben

Findet, der wirdts verlieren eben.

Vnd wer vmb meint willen sein Leben

Verleurt, der wirdts findten so eben.

⁴⁰Wer Euch aufnimpt, der nimpt mich auf,

Vnd wer mich aufnimpt, (Hört fein drauf)

Der nimpt den auf, der mich gsandt hat.

⁴¹Wer eynn Propheten Jn der that

Aufnimpt Jn eins Propheten Nahmen,

Der wirdt (wenn wir auffstehn allsamen)

Entpfahen eins Propheten Lohn,

Die Seligkeit bringen darvon.

Wer eynn Gerechten (wie sichs zimpt.)

Jn eins Gerechten Nahmn aufnimpt,

Der wirdt eines Gerechten Lohn

Entpfahn, Nemblich die Hiemels Cron.

⁴²Vnd wer diser Geringsten einen,

Mit solchen trewen würdet meinen,

Vnd Jhnen trencket mit gebüer,

Mit eym̅ Becher Kaldts Waßers nhür,

Vnd thuts Jn eines Jungers Nahmen,

Warlich Jch sag Euch allensamen,

Eß wirdt Jhm nicht bleibn vnbelohnt

Jm Hiemelß Brunn Er ewig wohnt.

⇨ Capitel 11