Matthäus 26

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 25

[34r]

Das 26. Capitel.

³Die Hohenpriestr vnd Schrifftgelerten

Die Elttste Jm Volck, All Mittgeferdten,

Hatten kein Ruh, Gedult, noch rasst,

Versamletten sich Jn Pallast

Des HohenPriesters Caiphas,

⁴Vnd hielten rath, Beschloßen das,

[34v]

Wie Sie Jhesum mit Listen grieffen

Vnd tödten, Hin vnd wider Lieffen.

⁵Sie sprachen abr: Eß wehr das besst,

Das es Ja nicht gescheh aufs Fest,

Auff das (Wo man hielt das Gericht)

Jm Volck ein Aufruhr werdte nicht.

☘

Ein Weib zum Herren Jhesu tratt,

Mit köstbarm Waßr ein Glas Sie hatt,

(Eß zu Bethanien gschach drauß,

Jns Außetzign Simonis Hauß)

Daßelbig Sie auff sein Heupt goß,

Da Er zu Tisch darjnnen saß.

Die Junger sahens, was Sie that,

Sprachen, worzu dient der Vnrath?

Diß Waßer, so man Vngeheur

Vmb sonst außschütt, hette möcht theur

Verkaufft, vnd den Armen so eben

Mit mhererm Nutz wordten gegeben.

Da das Jhesus merckte, sprach Er:

Was bkummert Jhr das Weib so sehr?

Sie hat ein gut wergk gthan ahn Mir,

Allzeit bey Euch habt Armen Jhr,

Mich aber habt Jhr nicht allzeit.

Das Sie, (daher kömpt ewer Neidt)

Auf meinen Leib gegossen hat,

Hat Sie gethan, ohn ewern schadt,

Drumb, das man wird begraben mich.

Warlich, warlich, Euch sage Jch,

Wo dises Euangelium

Clar wird gepredigt, vmb vnd vmb

Inr gantzen welt, zu allen Tagen,

Da wird man auch mit Warheit sagen

Zu Jhrm Gedechtnus, fur vnd fur,

Waß Sie gethan hat Jtzt ahn mir.

Der Zwölffn Einer, Sein Nahm, mit spott

Heisset, Judas Jscharioth,

Zun Hohenpriestern sich versprach:

Was wolt Jhr mir geben, Jch frag,

Wil Jch Jhn Euch verrathn, vmbs Gding?

Sie bothn Jhm dreißig Silberling.

Von dem ahn, sucht Er glegenheit,

Das Er Jhn verriet, nach bescheidt.

☘

Am Ersten Tag der SüßenBrod, Fragten die Junger: Herr, Jsts noth,
[35r]

Wo wiltu, das zueßen, wir

Das Osterlamb bereytten dir?

Er sprach: Zu Einem, Jn die Stadt

Hingeht, vnd sprecht zu Jhm: Es hat

Befohln der Meistr, vnd lest dir sagen,

Mein Zeit ist hier (das Creutz zutragen)

Mit meynn Jungern wil Jch bey dir

Die Ostern halten aus begir.

Die Junger theten (giengen hin)

Wie Jhesus hatt befohlen Jhn,

Vnd machtens Osterlamb bereyt.

Vnd als nhu kam die AbendZeit

Satzte Er mit den Zwölffen sich

Zu Tische, (vnd ward fast trawrig)

Da Sie assen, sprach Er: Warlich

Jch sage Euch, Eß wirdet Mich

Einer vntr Euch verrathen schwehr.

Vnd Sie wordten betrüebet sehr,

Vnd huben ahn, vnd Jhne fragten

Ein Jeglichr vnter Jhnn, vnd sagten:

Herre bin Jchs? Er aber sprach:

Der mit Mir mit der Hand so flach

Daucht Jn die Schüeßel, Der wird mich

Verrathen heüt vnschuldigklich.

Des Menschen Sohn dahin zwar geht,

Wie von Jhme geschrieben steht,

Doch weh dem Menschn, aus deß Rachgird,

Des Menschen Sohn verraten wirdt,

Eß wehr Jhm besser, das noch nie

Derselbig Mensch zeitlich alhie

Gebohren wehr, so mechtts Jhn quit.

Da sprach Judas, der Jhn verrieth,

Bin Jchs Rabbi? Er sprach zu Jhn:

Du sagsts mit deiner eignen Stimm.

Da Sie aber aßen, da nahm

(Jn beysein der Junger allsam)

Jhesus das Brod, danckt, vnd es brach,

Vnd gabs den Jungern hin, vnd sprach:

Nehmet, Esset, Das ist Mein Leib.

Vnd Er nahm (bey seiner weis bleib)

Den Kelch, vnd danckt, Jhnen den gab,

Trinckt alle draus, (wie Jchs hier hab)

Sprach Er: Das eben ist mein Blut

Des Newen Testaments so guth,

Welchs fur viele vergossen wirdt,

Zur Vergebung der Sundtn Begirdt.

☘

[35v]

Da gsprochen war der Lobgesang,

Da richtteten Sie Jhren Gang

Hienaus an Öelberg. Jhesus sprach:

(Hört, was Jch sag, Groß ist mein clag)

Jn diser Nacht, So werdet Jhr

Euch allesampt ergern ahn Mir.

Es steht gschrieben: Den Hirten Jch werdt

Schlagen, vnd die Schafe der Herdt

Die werdten all zustrewen sich.

Wenn aber aufferstehe Jch,

Wil Jch fur Euch, (wie Jch Jtzt bin)

Jn Galileam gehen hin.

Petrus antworttet, zu Jhm sprach:

Wenn Sie auch alle heut zu tag

Sich an dir ergertten, will Jch

Doch nimer mher ergeren Mich.

Jhesus sprach: Warlich Jch sag dir,

Jn diser Nacht (diß wort glaub Mir)

Eh dann der hane kreht, wirstu

Mich dreymhal verleugnen, wie nhu?

Petrus sprach zu Jhm: Vnd wenn Jch

Mit dir sterben müsst, wil Jch dich

Nicht verleugnen. Jn gleichen fall,

Sagten die ander Junger all.

Jhesus zu einem Hofe kahm,

Der hies Gethsemane mit Nahm,

Sprach zu seynn Jungern: Setzt Euch hie,

Biß das Ich dort hingeh, vnd (wie

Jch zuthun pfleg) Zum Vatter bet

Vnd nahm zu sich ahn solche stedt,

Petrum, (wie Er eß hett Jm brauch)

Die zween Söhn Zebedei auch.

Fieng ahn zutrawren vnd zuzagen,

Vnd seine hendt zuhauf zuschlagen)

Jhesus zu Jhnen sprach: O Gott,

Mein Seel ist betrüebt, biß ahn Todt,

Bleibet hie, vnd wachet mit Mir,

Fur Angst möcht Jch vergehen schir,

Vnd ging hin ein wenig, (verblicht.)

Fiel nider auf sein Angesicht,

Betet, vnd gar hertzlichen sprach,

Wie Er da auff der Erdten lag:

Mein Vatter, ist es mueglich hier,

So gehe diser Kelch von mir,

Doch nicht wie Jch wil, sondern strachs

Wie du wilt, Nach deym gfallen machs.

Vnd Er zu seinen Jungern kam,

Vnd fandt sie schlaffendt allesam,

[36r]

⇨ Capitel 27