Matthäus 26

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 25

[34r]

Das 26. Capitel.

³Die Hohenpriestr vnd Schrifftgelerten

Die Elttste Jm Volck, All Mittgeferdten,

Hatten kein Ruh, Gedult, noch rasst,

Versamletten sich Jn Pallast

Des HohenPriesters Caiphas,

⁴Vnd hielten rath, Beschloßen das,

[34v]

Wie Sie Jhesum mit Listen grieffen

Vnd tödten, Hin vnd wider Lieffen.

⁵Sie sprachen abr: Eß wehr das besst,

Das es Ja nicht gescheh aufs Fest,

Auff das (Wo man hielt das Gericht)

Jm Volck ein Aufruhr werdte nicht.

☘

^7aEin Weib zum Herren Jhesu tratt,

Mit köstbarm Waßr ein Glas Sie hatt,

⁶(Eß zu Bethanien gschach drauß,

Jns Außetzign Simonis Hauß)

^7bDaßelbig Sie auff sein Heupt goß,

Da Er zu Tisch darjnnen saß.

⁸Die Junger sahens, was Sie that,

Sprachen, worzu dient der Vnrath?

⁹Diß Waßer, so man Vngeheur

Vmb sonst außschütt, hette möcht theur

Verkaufft, vnd den Armen so eben

Mit mhererm Nutz wordten gegeben.

¹⁰Da das Jhesus merckte, sprach Er:

Was bkummert Jhr das Weib so sehr?

Sie hat ein gut wergk gthan ahn Mir,

¹¹Allzeit bey Euch habt Armen Jhr,

Mich aber habt Jhr nicht allzeit.

¹²Das Sie, (daher kömpt ewer Neidt)

Auf meinen Leib gegossen hat,

Hat Sie gethan, ohn ewern schadt,

Drumb, das man wird begraben mich.

¹³Warlich, warlich, Euch sage Jch,

Wo dises Euangelium

Clar wird gepredigt, vmb vnd vmb

Inr gantzen welt, zu allen Tagen,

Da wird man auch mit Warheit sagen

Zu Jhrm Gedechtnus, fur vnd fur,

Waß Sie gethan hat Jtzt ahn mir.

¹⁴Der Zwölffn Einer, Sein Nahm, mit spott

Heisset, Judas Jscharioth,

Zun Hohenpriestern ¹⁵sich versprach:

Was wolt Jhr mir geben, Jch frag,

Wil Jch Jhn Euch verrathn, vmbs Gding?

Sie bothn Jhm dreißig Silberling.

¹⁶Von dem ahn, sucht Er glegenheit,

Das Er Jhn verriet, nach bescheidt.

☘

¹⁷Am Ersten Tag der SüßenBrod,

Fragten die Junger: Herr, Jsts noth,

[35r]

Wo wiltu, das zueßen, wir

Das Osterlamb bereytten dir?

¹⁸Er sprach: Zu Einem, Jn die Stadt

Hingeht, vnd sprecht zu Jhm: Es hat

Befohln der Meistr, vnd lest dir sagen,

Mein Zeit ist hier (das Creutz zutragen)

Mit meynn Jungern wil Jch bey dir

Die Ostern halten aus begir.

¹⁹Die Junger theten (giengen hin)

Wie Jhesus hatt befohlen Jhn,

Vnd machtens Osterlamb bereyt.

²⁰Vnd als nhu kam die AbendZeit

Satzte Er mit den Zwölffen sich

Zu Tische, (vnd ward fast trawrig)

²¹Da Sie assen, sprach Er: Warlich

Jch sage Euch, Eß wirdet Mich

Einer vntr Euch verrathen schwehr.

²²Vnd Sie wordten betrüebet sehr,

Vnd huben ahn, vnd Jhne fragten

Ein Jeglichr vnter Jhnn, vnd sagten:

Herre bin Jchs? ²³Er aber sprach:

Der mit Mir mit der Hand so flach

Daucht Jn die Schüeßel, Der wird mich

Verrathen heüt vnschuldigklich.

²⁴Des Menschen Sohn dahin zwar geht,

Wie von Jhme geschrieben steht,

Doch weh dem Menschn, aus deß Rachgird,

Des Menschen Sohn verraten wirdt,

Eß wehr Jhm besser, das noch nie

Derselbig Mensch zeitlich alhie

Gebohren wehr, so mechtts Jhn quit.

²⁵Da sprach Judas, der Jhn verrieth,

Bin Jchs Rabbi? Er sprach zu Jhn:

Du sagsts mit deiner eignen Stimm.

²⁶Da Sie aber aßen, da nahm

(Jn beysein der Junger allsam)

Jhesus das Brod, danckt, vnd es brach,

Vnd gabs den Jungern hin, vnd sprach:

Nehmet, Esset, Das ist Mein Leib.

Vnd Er nahm (bey seiner weis bleib)

Den Kelch, vnd danckt, Jhnen den gab,

Trinckt alle draus, (wie Jchs hier hab)

Sprach Er: Das eben ist mein Blut

Des Newen Testaments so guth,

Welchs fur viele vergossen wirdt,

Zur Vergebung der Sundtn Begirdt.

☘

[35v]

Da gsprochen war der Lobgesang,

Da richtteten Sie Jhren Gang

Hienaus an Öelberg. Jhesus sprach:

(Hört, was Jch sag, Groß ist mein clag)

Jn diser Nacht, So werdet Jhr

Euch allesampt ergern ahn Mir.

Es steht gschrieben: Den Hirten Jch werdt

Schlagen, vnd die Schafe der Herdt

Die werdten all zustrewen sich.

Wenn aber aufferstehe Jch,

Wil Jch fur Euch, (wie Jch Jtzt bin)

Jn Galileam gehen hin.

Petrus antworttet, zu Jhm sprach:

Wenn Sie auch alle heut zu tag

Sich an dir ergertten, will Jch

Doch nimer mher ergeren Mich.

Jhesus sprach: Warlich Jch sag dir,

Jn diser Nacht (diß wort glaub Mir)

Eh dann der hane kreht, wirstu

Mich dreymhal verleugnen, wie nhu?

Petrus sprach zu Jhm: Vnd wenn Jch

Mit dir sterben müsst, wil Jch dich

Nicht verleugnen. Jn gleichen fall,

Sagten die ander Junger all.

Jhesus zu einem Hofe kahm,

Der hies Gethsemane mit Nahm,

Sprach zu seynn Jungern: Setzt Euch hie,

Biß das Ich dort hingeh, vnd (wie

Jch zuthun pfleg) Zum Vatter bet

Vnd nahm zu sich ahn solche stedt,

Petrum, (wie Er eß hett Jm brauch)

Die zween Söhn Zebedei auch.

Fieng ahn zutrawern vnd zuzagen,

Vnd seine hendt zuhauf zuschlagen)

Jhesus zu Jhnen sprach: O Gott,

Mein Seel ist betrüebt, biß ahn Todt,

Bleibet hie, vnd wachet mit Mir,

Fur Angst möcht Jch vergehen schir,

Vnd ging hin ein wenig, (verblicht.)

Fiel nider auf sein Angesicht,

Betet, vnd gar hertzlichen sprach,

Wie Er da auff der Erdten lag:

Mein Vatter, ist es mueglich hier,

So gehe diser Kelch von mir,

Doch nicht wie Jch wil, sondern strachs

Wie du wilt, Nach deym gfallen machs.

Vnd Er zu seinen Jungern kam,

Vnd fandt sie schlaffendt allesam,

[36r]

Vnd sprach zu Petro: Könnet Jhr

Denn nicht ein Stundt wachen mit mir.

Wachet vnd betet, das Jhr nicht

Jn Anfechtung fallet. Mher spricht:

Der Geist ist willig zwar zur Sach,

Das Fleische aber ist gar schwach.

Zum andr mhal gieng Er aber hin,

Betet, vnd sprach hertzlich Jm Sin:

Mein Vater, ist es nicht mueglich,

Das diser Kelch von Mir geh, Jch

Trincke Jhn denn, So gscheh dein Will.

Vnd Er kam, vnd fandt Sie Jn still

Aber schlaffendt, (Ruh thet Jhnn wol)

Vnd Jhre Augen warn Schlafs vol.

Er ließ Sie, vnd abr mhal hinging,

Zum Drittenmhal zubethn anfieng,

Vnd redet dieselbigen Wort.

Da kam Er zu seynn Jungern dort,

Sprach zu Jhnen: Wie köndt Jhr druhen?

Ach wolt Jhr nhu schlaffen vnd ruhen?

Die Stundt ist hie, (den Schlaf abwendt)

Das des Menschen Sohn Jn die Hendt

Der Sundr vberantworttet wirdt,

Aus lautterm haß vnd Neids begirdt,

Lasset vns gehen, nhür aufsteht,

Sieh, Er ist da, der mich verretth.

Alß Er noch redet, Judas kam Judas,

Der Zwölffen Einer her die straß,

Vnd mit Jhm eine große Schar,

Mit Schwertn vnd Stangen, offenbar

Von den HohenPriestern (entbrandt)

Vnd Elttsten des Volcks hergesandt.

Vnd der Verräther hatt so eben

Jhnen ein Merckzeichen gegeben,

Vnd gsagt: Welchen Jch küessen werdt,

Der ists, den greifft, wie Jhr begert.

Vnd alßbaldt trat Er zu Jhesu,

Vnd sprach: Rabbi, Gegruesst seystu,

Vnd küeßet Jhn. Vnd Jhesus sprach:

Jch muß zwar leiden dise Schmach,

Mein Freund, warvmb bist kohmen Du?

Da traten Sie Alle hinzu,

Vnd legten ahn Jhesum die Hendt,

Jm Hertzen vnd Gemüet verblendt.

Vnd Sihe, Einr aus denen zwar,

Die mit Jhesu wahren aldar,

Reckt die Hand aus, Zog aus sein Schwert,

Ernstlich zuwehren sich begert.

[36v]

Vnd schlug des Hohenpriesters Knecht,

Hieb Jhm ein Ohr ab, traf Jhn recht.

Da sprach Jhesus zu Jhm, diß wort:

Stecke dein Schwert ahn seinen Ort,

Denn, wer das Schwert nimpt, (Jst die Summ)

Der sol durchs Schwert auch kohmen vmb.

Oder, Meinstu, das Jch nicht kundt

Meynn Vatter bittn aus Hertzens grundt,

Das Er zuschickte Mir (seym Sohn)

Engel, mher dann Zwölff Legion?

Wie würdt aber erfüllt die Schrifft?

Also muss gehen, wie michs trifft.

Jhesus sprach zu der Stundt vnd Zeit,

Zu der Scharen: Jhr alle seidt,

Alß zu einem Mörder, ausgangen,

Mich zufahen, Mit Schwerttn vnd Stangen,

Bin Jch doch teglichen bey Euch

Geseßn, vnd hab gelehrt ohn scheuch

Jm Tempel, Vnd Jhr Mich nicht habt

Gegrieffen, noch nach Mir geschnappt.

Aber, das ist alles geschehen,

Das Mein Leyden so soll ergehen,

Vnd die Schrifft der Propheten nühr

Erfullet wurdten, nach gebuer.

Jhn alle Jünger da verliessen,

Vnd flohen, wider Jhr Gewießen.

Sie fuerten Jhesum hin, aus haß,

Zum hohenpriester Caiphas,

Dahin die Schrifftglerten heuffig

Vnd Elttstn, hatten versamlet sich.

Petrus aber sich deßn anmasst,

Folgt nach von fern, biß Jn Pallast

Des hohen Priesters, vnd gung schlecht

Hienein, Vnd setzt sich bey die Knecht.

Auf das Er sehe, vnd vernehm,

Wo eß hienaus wolt, vnd hinkehm.

Die Hohenpriester vnd Elttsten,

Vnd der gantz Rath die Sach weltzten,

Suchtten falsch Zeugnis, dichttn Jm Sinn,

Wider Jhesum, auff das Sie Jhn

Tödteten, vnd fundten gar keins,

Vnd wiewol (eusserlichen scheinß)

Viel falscher Zeugen herzuh tratten,

Fundten sie keins, (keins wolt geraten)

Zuletzt tratten herzu, mit lachen,

Zween falsche Zeugen, die da sprachen:

[37r]

Er hat gesagt: Jch kan furwahr

Den Tempel Gotts abbrechen gar,

Vnd denselben (man solt Jhm trawen)

Jn dreyen Tagen wider bawen.

Vnd der Hohnpriester stundte auff,

Vnd sprach zu Jhm: Antworttst nichts drauf,

Zu dem, das dise wider dich

Zeugen, vor vnß hie öffentlich?

Aber, Jhesus schweig hirzu still.

Dem Hohenpriester es nicht gefiel,

Er antworttet, vnd zu Jhm sprach:

Jch dich beschwere heut zu tag,

Ja bey dem Lebendigen Gott,

Das du vns sagest ohne spott,

Ob du seyst, (mach vnß keynn verdries)

Christus, der Sohn Gottes gewies?

Jhesus sprach: Du sagsts. Doch hieneben

Sage Jch Euch (merckt mich nhür eben)

Nemblich, von nhu ahn wirdts geschehen,

Das Jhr des Menschen Sohn werdt sehen

Sitzen zur Rechten der Krafft sein

Vnd kohmen Jn den Wolckn herein

Des hiemels. Da zureiß aus gach,

Der Hohpriester sein Kleydr, vnd sprach:

Er hat gelestert Gott so sehr,

Was durffn wir weitter Zeugniß mher?

Sihe, Jtzt habt Jhr all Jn gmein

Gehöret die Gottslestrung sein,

Wie duncket Euch? Was wolln wir machen?

Sie antwortten Jhme, vnd sprachen:

Er ists Tods schuldig, den zuleidten,

Sie Jn sein Angesicht ausspeyten,

Vnd schlugen Jhn mit Feusten hart,

Ettliche aber aus Vnart,

Jhn schlugen Jn das Angesicht,

Ließen sich seiner Jammern nicht,

Vnd sprachen: Christe, vns weißag,

Wer ists? der dir gab disen Schlag?

Petrus aber, (als ein frembdt Gast)

Saß furchtsam draußen Jm Pallast,

Es trat zu Jhm ein Magd, die sprach:

Du bist gleich andern gfolget nach,

Vnd du warest auch vorhin da,

Mit Jhesu aus Galilea.

[37v]

Er leugnet aber fur Jhn allen,

Vnd sprach: Wie magst solch wort herlallen?

Ich weiß nicht, was du sagest Mir.

Alß Er abr hienaus gieng zur Thüer,

Sah Jhn ein Andere, vnd sprach

Zu denen, die da wahren: Ach,

Dieser war auch vothin zur stedt,

Mit dem Jhesu von Nazareth.

Vnd Er abermal leugnet mher,

Vnd schwur darzu vermeßendt sehr,

Jch kenn deß Menschens nicht ein Zeil.

Vnd vber eine kleine Weil

Tratten hinzu, welche da stundten,

(Dein Geist hett sich dann hiher fundten)

Sprachen Sie zu Petro: Warlich,

Du bist auch einer, (Man kenndt dich)

Von denen, die da folgten nach,

Denn dich Verratthet deine Sprach.

Da hub Er ahn, sich zuuerfluchen

Vnd schweren, (Jch hab nichts zusuchen

Bey Jhm) Ich kenn deß Menschen nicht.

Vnd alßbaldt kreht der han, was gschicht.

Petrus ahn die wortt Jhesu dacht,

Da Er zu Jhme also sagt:

Eh der Han krehen wird, gwißlich

Wirstu dreymal verleugnen mich,

Vnd gieng heraus, weint bitterlich,

Ein Sunder, hirmit tröste sich.

⇨ Capitel 27