Matthäus 11

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 10

[14v]

Das 11. Capitel.

Da Johanns Jm Gefengknis ligt,

Von Christi Wercken hört bericht,

Er seiner Junger sandte Zween,

Vnd lies Jhm sagen, Bistu denn

Diser, der kohmen solle schier?

Oder, Solln warttn eins andern wir?

Jhesus antworttet, zu Jhnn sprach:

Geht hin, vnd was sich bgibt all tag

Das alles sagt Johanni wider,

Was Jhr seht vnd hört, auf vnd nider,

Das nemblichen die Blinden sehen,

Vnd die Lahmen ohn Krücken gehen,

[15r]

Die Aussetzigen werdten rein,

Die Tauben hören alles fein

Die Todtn auffstehen widerumb . Den Armn wirdts Euangelium Gepredigt, Vnd selig ist der

Der sich an Mir nicht ergert mher.

Da die hingiengen, Fienge ahn

Jhesus zuredten von Johann

Zum Volck: Was seydt Jhr mit verlangen

Hienaus Jn die Wüsten gegangen,

Zusehen? Wolt Jhr ein Rohr sehen,

Das hin vnd her der Windt thut wehen?

Oder, was seidt Jhr hienaus gangen

zusehen? Woltet Jhr zum Prangen

Eynn Menschn Jn weichen Kleidern sehen,

Hin vnd widr, auf vnd nidergehen?

Siehe, die da weich Kleider tragen,

Sindt Jn der Köng Heuser zurfragen,

Oder, was seidt Jhr hienaus gangen

Zusehen? Wolt Jhr mit betrangen,

Etwa einen Propheten sehen?

Ja, Jch sag Euch (Er wird bestehen).

Der auch mher ist denn ein Prophet,

Denn dießr ists, von dem gschrieben steht:

Siehe, Jch sendte fur dir her

Meynn Engel, der mit seiner Lehr,

Mit allem vleiß, trewlich vnd whol

Deynn weg fur dir bereiten soll.

Warlich Jch sage Euch zuuorn,

Vnttr alle, die von Weibern sindt gborn,

Jst nicht auffkohmmn, der Grösser sey,

Denn Johannes der Teuffer frey.

Der aber ist Jm Hiemelreich

Der kleinst, ist grössr denn Er (Jch zeig.

☘

Da fing Er ahn die Städt zuscheldten,

Vnd nacheinandter zuuermeldten,

Jn welchr, am meisten diser Jharen

Seiner Thaten geschehen waren,

Vnd hattn sich doch gebessert nicht.

Weh dir Chorazim, Christus spricht,

Vnd wehe dir Bethsaida,

Wehen solche Thatnn, (es ist Ja)

Zu Tyro vnd Sidon geschehen,

Alß bey Euch gschehn sindt, vnd gesehen,

[15v]

Sie hettn Jm Sack vorzeittn allsam

Vnd Jn der Aschen Bueß gethan.

Doch sag Jch Euch, es wird Tyro

Vnd Sidon treglicher also

Ergehen am Jungsten Gericht,

Denn Euch, deme ist anderst nicht.

Vnd du Capernaum, (Hör zu)

Die hoch, biß an den Hinmel du

Erhaben bist, Du wirst hinuntter

Biß Jn die Hell (ist zwar kein wunder)

Gestossen werdten, wirsts baldt sehen,

Denn so zu Sodom wehrn geschehen,

Die Thaten, so bey dir gschehn sindt,

Sie noch heutiges tages stundt,

Doch Jch sag Euch (Mir ists bekandt)

Es wurdet der Sodomer Landt

Treglicher ergehen, denn dir,

Am Jungsten Grichte, glaube Mir.

Jhesus antwortt zurselben Zeit,

Vnd sprach: Vater, Jn einigkeit,

Vnd Herre Hiemels vnd der Erdt,

Jch preise dich (du bists Je werth)

Das du solches, aus trewen sorgen,

Den Weysn vnd Klugen hast verborgen,

Vnd hast es nach deym willen zwart,

Den Vnmundigen offenbart.

Ja Vater, Denn also ists nhür

Wolgfellig gewesen fur dir,

Von meinem Vatter, Mir (seym kindt)

Alle ding vbergeben sindt.

Vnd Niemandt kennet mit gebüer

Den Sohne, denn der Vatter nhür

Vnd niemandtes den Vatter kenndt,

Denn nhür der Sohn (der Jhn so nenndt)

Vnd wems der Sohn wil offenbaren,

An seiner trew lest Er nichts sparen.

Kompt zu Mir all, die Jhr (Er schreyht)

Muehselig vnd beladen seydt,

Jch Euch erquicken wil vnd kan.

Nempt auf Euch Mein Joch (Frau vnd Mann)

Vnd lernt von Mir, Denn, (Jn alln Schmertzen)

Bin Jch sanfftmütig, vnd von hertzen

Demütig, So werdt findten Jhr

Ruge fur Ewer Seel, an Mir,

Denn mein Joch (er gar baldt verschleicht)

Jst sanfft, vnd Meine Lasst ist leicht.

☘

⇨ Capitel 12