Matthäus 9

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 8

[12r]

Das 9. Capitel.

¹Jhesus hin Jn das Schief eintrat,

Fuhr widr herüb, kam Jn sein Stadt,

²Sie eynn Gichtbrüchttgen zu Ihm brachten,

Der lag auffm Betth, Sein Noth sie klagten.

Da nhun Jhesus Jhrn Glauben sah,

Sprach Er zum Gichttbrüchttgen allda:

Seye getrost, Mein Sohn, Solst leben,

Vnd deine Sünd sey dir vergeben.

³Vnd Sihe, ettlich Schrifftgelerten,

(Damit Sie nhür Jhesum Vnehrten)

Sprachen bey sich selbst, Jhm zum spott:

Dieser lestert Jm Hiemel Gott.

⁴Da Jhesus Ihre Gdancken sah,

Sprach Er: Worvmb denckt Jhr allda

So args Jn Ewern hertzen nhur?

⁵Welches ist leichter, nach gebüer

Zusagen? Dir sind deine Sünd

vergeben, (die Jch angekündt)

Oder zusagen, Stehe auf,

Vnd wandele deyn Gangk vnd Lauf?

⁶Auff das Jhr aber wiesst, (nempts achtt)

Des Menschen Sohn hab fug vnd Macht

Auff Erdten, die Sund zuuergeben,

Sprach Er zum Gichtbruchttigen eben:

Steh auf, dich selbst hiran nicht seüm,

Heb dein Betth auf, vnd gehe heym,

⁷Vnd Er stundt auf, ging heym, froh war.

⁸Da das Volck das sahe, Sichs gar

Sehr hoch verwundert, dancklob sagt,

Vnd preiste Gott, der solche Macht,

[12v]

Kranckt laut zufeylen Jn der That,

Den Menschn aus Gnad gegeben hat.

⁹Jhesus von dannen gieng, vnd sah

Eynn Menschen am Zoll sitzen da,

Der hieß Matthaeus, zu Jhm sprach:

Folge Mir: Solchs Allßbaldt geschach.

☘

Jhesus sprach, vnd gab den bericht:

¹²Die Starcken durffn des Artztes nicht,

Sondern die Kranckn hohln Jhn herbey.

¹³Geht abr hin, vnd lernt, was das sey,

(Jch habe wolgefalln allzeit

Nhür allein an Barmhertzigkeit

Vnd nicht am Opffer) Ich bin kohmen, Die Sünder, vnd gar nicht die Frommen

Zur Bueß zurueffen, (hie auf Erdten,

Auff das all Menschen selig werdten.

☘

^18>/i>Ein Oberster bracht ahn sein Clag,

Vnd fiel fur Jhm nider, vnd sprach:

Herr, Meine Dochter, (Sie war fromm)

Jst Jtzt gestorben, aber kohmm,

Vnd leg dein Hand auf Sie, So wird

Sie widerumb viuificirt.

¹⁹Jhesus stundt auf, vnd folgt Jhm nach,

Vnd seine Junger, was geschach?

²⁰Siehe, ein Weib, das Zwölff Jhar lang

Ahn Jhr gehabt hatt den Blutgang,

Von hindten her, zu Jhme trat

Vnd ruehrt ahn, seins Kleids Saum vnd Nad,

²¹Denn Sie sprach bey Jhr selbst, Möcht Jch

Nhür sein Kleid anrüehren heimlich,

So würde Jch gesundt. ²²Da wendt

Sich Jhesus vmb, Kandt Jhr Elendt,

Vnd Sahe sie, vnd sprach so frey:

Getrost, O Meine Dochter, sey,

Dein Glaube hat geholffen dir,

Den du empfangen hast von Mir,

Vnd das Weib ward krefftig gesundt

Jn Puncto zu derselben Stundt,

²³Alß Er Jns Obersten Hauß kam,

Die Pfeiffer sahe vnd vernahm,

Vnd das Getümmel des Volcks hort,

²⁴Sprach Er zu Jhnen dise Wortt:

Weichet, denn dieses Mägdelein

Jst nicht todt, sondern schläffet fein,

[13r]

Vnd Sie verlachtten Jhne gar.

²⁵Als nhu das Volck außgtrieben war,

Gieng Er hienein, sich zu Jhr wandt,

Vnd ergreiff sie bey Jhrer handt,

Da stundt das Mägdlein auf, ohn qual,

²⁶Vnd diß Gerücht weit hin erschal

Jn daßelbige gantze Land,

Bey Arm vnd Reichn Jn allen Standt.

²⁷Zween Blinden folgten Jhesu nach,

Ein Jeder schrieh Jhn ahn, vnd sprach:

Ach Du Sohn Dauid, vnßer dich

Erbarme gantz genedigkich,

Vmb Hülffe Sie Jhn ernstlich bathen,

²⁸Da Er heim kam, zu Jhm Sie traten,

Vnd Jhesus sprach: Nhu saget ahn,

Gleubt Jhr, das Jch Euch solchs thun kan?

Sie sprachn: Herr, Ja, Die Noth vns füert.

²⁹Drauff Er Jhre Augen anruehrt,

Vnd sprach: Was Euch feile, Jch wol seh,

Nach Ewerm Glauben Euch gescheh.

³⁰Vnd Jhre Augen hell vnd clar

Geöffnet wordten gantz vnd gar.

Vnd Jhesus Sie bedrawt, vnd sprach:

Sehet zu, Keiner es nachsag,

Das es niemandt etwa erfahr,

³¹Aber, Sie machten Jhn ruchtbar

Jn demselbigen gantzen Land,

Vnd wurdt diß Wunderwergk bekandt.

☘

³²Eynn Menschen brachten Sie Jhm dar,

Der Stumm vnd auch beseßen war,

³³Vnd da der Teufel widerumb

War ausgetrieben, redt der Stummb.

Vnd das Volck verwundert sich hoch,

Vnd sprach: Solchs Jn Jsrael noch

Nie ist Jn alln derselben Ortthen

Ersehen, noch vernhommen wordten,

³⁴Aber, die Phariseer sprachen:

Die Teuffl Er durch kein ander Sachen

Austreibt, als durch den Obersten

Der Teuffl, hirmit würckt Ers am sehrsten,

☘

³⁵Jn alle Stedt vnd Märckt vmbher

Ging Jhesus, vnd treib seine Lehr

Jn Jhrn Schulen, Predigt deßgleich

Das Euangelium vom Reich,

Vnd war Jm Volck zuheyln bereit

Allerley Seuche vnd Kranckheit.

[13v]

³⁶Vnd da Er sahe des Volcks Scharen,

Jammrt Jhn deßelben, denn Sie waren

Verschmachttet, vnd zerstrewt durch Wahn,

Wie Schafe, so keynn Hirtten hahn.

³⁷Da sprach Er zu den Jungern sein:

Die Erndt ist gros, Aber gar klein,

Vnd wenig der Erbeytter sindt,

³⁸Drumb bittet hertzlich Lieben Kindt,

Den Herrn der Erndte, das ohn Endt,

Er Erbeyttr Jn sein Erndte sendt.

⇨ Capitel 10