Matthäus 5

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 4

[6r]

Das 5. Capitel.

²Jhesus thet auf seynn Göttlichn Mundt

Lehrt sein Junger, des Gsetzes Grundt,

Vnd sprach: ³Selig sindt dise Kindt,

Die Geistlich Arm vnd Elendt sindt,

Denn Ihrer ist das Hiemelreich.

⁴Selig sindt alle die deßgleich,

So leide tragen hie auf Erdten,

Denn Sie sollen getröstet werdten,

⁵Selig die Sanfftmütgen sindt,

Denn weil Einfeltig vnd gelindt

[6v]

Werdten das Erdreich Sie besitzen,

Nicht die, so klug, vnd hoher witzen.

Selig sindt, die hungert allzeit

Vnd durstet nach der Grechtigkeit,

Denn Sie, solln ewig werdten satt,

Selig sindt, vnd findten auch Gnad,

Die Barmhertzigen fromme Leut.

Denn Sie werdten Barnhertzigkeit

Erlangen. Selig sindt ohn schertzen,

Alle die, so sindt reines Hertzen,

Denn Sie werdten Gott schawen ahn.

Selig sindt die Friedferttge Mann,

Denn Sie Gotts Kindter heißen werdten,

Selig sindt die, so hier auf Erdten

Verfolgt werdten, durch feindtlich Grillen

Nhür allein vmb Gerechtkeit willen,

Denn das Hiemlreich, ist Jhr, Jn ruh.

Selig seidt Jhr, wenn noch darzu

Die Menschen Euch vmb meint willn schmehen,

Verfolgn, vnd ewr Recht verdrehen,

Vnd allerley vbelß, aus hohn,

Wider Euch reden, vnd liegen dron.

Seid frölich vnd getrost, es wird

Jm Hiemel Euch recompensirt

Vnd wohl belohnt werdten, Jch sag,

Denn also, vnd Jn gleicher schmach

Haben Sie verfolgt die Propheten

Jm Land vmbher, vnd Jn den Stadten,

Die da vor Euch gewesen sindt,

Vnd nhur gethan, als sey Gott blindt.

Jhr seidt das frische Saltz der Erdten,

Wo nhun das Saltze thum wird werdten,

Womit sol man saltzen? Sagt her,

Zu nichts ists hinfurt nutze mher,

Denn das manß heraus schütt, vnd laß

Die Leut zutretten auf der Gaß.

Jhr seidt der Welt licht, Es mag nicht

Die Stadt, die auf eym Berge ligt,

Verborgen sein, Man Zundet auch

Ein Licht nicht ahn, zum Vngebrauch,

Das es ein Magd vnd faule Metz,

Vnter einen Scheffel hinsetz,

Sondern auff einen Leuchter dar,

So leuchts den allen, offenbar,

Die Jm Hauß sindt, verlescht auch nicht.

Alßo, last leuchten Euer Licht,

[7r]

Fur den Leuten, so vmb Euch gehen,

Das Sie ewer gut Wercke sehen,

Vnd ewern Vattr Jm Hiemel preisen,

Demselben Ehre zubeweisen.

☘

Wer Jemandt tödtet Jn gemein,

Der sol des Gerichts schuldig sein.

Wer mit seym Bruder, Jn Vnhuldt

Zurnet, der tregt dergleichen Schuldt.

Wer zu seym Bruder Racha sagt,

Derselb des Rahts sich schuldig macht,

Wer aber sagt, Ein Narr du bist,

Des hellischen Fewrs schuldig ist

☘

Versüne dich mit deinem Bruder

Lig nicht teglich Jns Zorneß Luder,

Vnd alßdann komm, opffr dein Gab,

Ein willferiges Hertz auch hab,

Gegen deym Widersacher baldt,

Laß deinen Groll nicht werdten alt,

Dieweil dus noch (als Ja ein Christ)

Bey Ihme auf dem Wege bist.

☘

Jhr habt gehört, (nempts wol Jn acht)

Das zu den Alten ist gesagt,

Du solt nicht Ehbrechn, aber Jch

Sage Euch, Wer vnzüchttigklich

Ein weib ansieht, Jhr zubegeren,

Der kan sichs keines wegs erwehren,

Er hat die Ehe schon mit Ihr

Gebrochn Jm hertzen aus begir,

Ergert dich dein rechts Aug, (folg Mir)

So reiß es aus, vnd wirffs von dir.

Ergert dich dein recht handt (folg Mir)

Hawe sie ab, vnd wirffs zu dir.

Es ist dir bessr, vnd nicht so herb,

Das eines deiner Glied verderb,

Vnd nicht der gantz Leib Jn die Hell

Geworffen werdt bletzlich vnd schnell.

Eß ist auch gsagt vor alter Zeit,

Wer sich von seinem Weibe scheydt,

Der soll Jhr einen Scheidtbrieff geben,

Jch aber, Sage Euch so eben,

[7v]

Wer sich von seinem weibe scheidt,

(Sie seye dann Ehbruchs beschreyht)

Der macht, das sie die Ehe bricht,

Vnd ferner dises draus geschicht,

Wer eine Abgescheydtne freyht,

Bricht auch die Eh, Jhms nicht gedeyht.

Jhr weitter ghört habt, vnd mans liesst,

Das zu den Alten gsaget ist,

Du solt thun keinen falschen Eydt,

Auch nicht baldt hirzu sein bereit,

Vnd deinen Eyd Gott halten solt.

Jch aber sag Euch (widerholt)

Das allerding Jhr nicht solt schweren,

Wo eß Gott gereicht zu vnehren.

☘

Ewer Redt aber solle sein

Ja, Ja, vnd Nein, sey vnd bleib Nein.

Was drüber ist, vom vbel ist,

Darfur hüet sich ein frommer Christ.

☘

⇨ Capitel 6