Matthäus 14

Diese Seite wurde noch nicht korrekturgelesen!

Zurück zur Kapitelübersicht

⇦ Capitel 13

[18v]

Das 14. Capitel.

Johannes, Herodem hart strafft,

Das Er mit Blutschandt war behafft,

Die Er mit Herodias treib

Seines Bruders Philippus Weib.

Drumb Jhn man Jns Gefengknus legt,

Herodes wurdt zu Zorn bewegt.

Da Er nhu seynn Jharßstag beging,

Herodias Dochter anfing

Zutantzn. Herodi gfiel es wol,

Sie dantzt vor Jhm, war frewden vol.

[19r]

Herodes durch eyn Eydt verhies,

Was Sie fordert, solt sein gewies.

Von Jhrer Mutter hierJnn zwar

Vorher Sie abgerichttet war,

Sie sprach: Vff einer Schüßel hier

Johanß des Teuffers Heupt gib Mir.

Der König ward trawrig, voll Leid,

Jm sinn lag Jhm sein gschworner Eydt,

Doch vmb deß willn, vnd die mit Jhm

Zu Tisch saßen, Er Jn eym̅ grimm

Befahl, eß Jhr zugeben dar.

Vnd schicket hin, ein KrigsKnechts Schar,

Das Jm Gefengknis, (Erß erleubt)

Johannes schnell würdte enthaupt.

Vnd sein Haupt ward getragen her,

Jn einer Schüeßel, nach beger

Des Megdleins, vnd deme gegeben,

Vnd Sie brachts Jhrer Mutter eben.

Sein Jünger kahmen, Jhn abhuben,

Nahmen seynn Leib, vnd Jhn begruben.

Alß Sie Jhn bracht hatten zur Ruh,

Verkündigten Sie es Jhesu,

Er wiech von dann, (wolt dar nicht sein)

Auffm Schieff, Jn ein Wüsten allein,

Das Volck zu fues, amselben tag,

Aus den Stedten Jhm folgte nach.

Vnd Jhesus ging herfur, vnd sah

Das große Volck, so war allda,

Vnd Jammert Jhn derselben sehr,

Heylt Jhre Kranckn all, vmb Jhnn her.

Hier Sie sich lagern Jn das Gras,

Denn es Jn einer Wüsten was,

Sie mit Funff Brod, zween Fischen speist,

Sein Göttlich Macht ahn Jhnn beweist.

Sie aßen all, vnd wordten satt,

Vnd huben auf, aus seiner Gnad

Zwölff Körb voll Brocken Jn gemein.

So v̈berig geblieben sein.

Die gessen hatten auf dem Plan,

Der waren bey funff Tausent Mann,

Ohn Weyber vnd Kinder darbey,

Sag, Obß nicht Gottes Wundrwerck sey?

☘

[19v]

Da Jhesus nhu auff Jhre Straßen,

Das Volck widr hatt von sich gelaßen,

Steig Er auf einen Berg allein,

Das Er betet zum Vatter sein.

Die Jünger schickt Er vor sich her,

Jn einem Schieff hin auf das Meer.

Von Wellen liett eß noth so gar,

Denn Jhm der wind zu wider war.

Jn der Vierdten Nachtwach kam her

Jhesus zu Jhnn, ging auf dem Meer,

Vnd da die Jünger Ihne sahen

Auf dem Meer gehen zu sich nahen,

Erschracken Sie, sprachen bey sich:

Eß ein Gespenst ist sichtbarlich,

Vnd schriehen sehr aus Furchtsgestalt.

Aber Jhesus redet alß baldt

Mit Jhnen, Sprach: Getrost nhür seidt,

Jch binß, fürcht Euch nicht, habt kein Leid.

Petrus antworttet Jhm, vnd sprach:

Herr, Bistu eß, (Mein Glaub ist schwach)

So heiß mich auf dem Waßer hier

Mich kohmen, vnd gehen zu dir?

Vnd Er sprach: Komm her auf dem Pfat.

Vnd Petrus aus dem Schieffe trat,

Ging auf dem Waßer, das bequem

Er baldten zum Herrn Jhesu kehm.

Er sah abr einen starcken Windt,

Da erschrack Er, Hub ahn gelindt

Zusincken, schreyhe laut, vnd sprach:

Herrr hilff Mir, Herr hilff Mir, Ach, Ach,

Jhesus die Handt ausrecket baldt

Vnd Jhn ergreiff, freundlicher gstalt,

Vnd sprach zu Jhm: O, Du bist gar

Ein kleingleübiger Mensch furwahr,

Warumb zweyfflstu an Worttten mein?

Vnd Sie traten Jnß Schieff hienein,

Vnd der Wind leget sich hinwider.

Die Jm Schieff warn, fieln fur Jhm nider,

Vnd sprachen: Sindt wir vorgewiest,

Das warlich Gottes Sohn du bist.

Sie schiefftn hienüber auf der stedt,

Kahmen Jns Land Genezareth.

[20r]

Vnd da die Leut derselben Orthen,

Seiner gewahr vnd Jnnen wordten,

Schickten sie aus, allnthalbn vmbher

Jns gantze Land, wo Jemand wehr,

So mit Leibs Seuch beladen sey

Vnd brachten zu Jhm allerley

Vngsundte Leute, vnd Jhn bathen,

Er wolt Jhnen helffen vnd rathen,

Also, das solche Leut nhur kaum

Ahnrüretten seins Kleides Saum,

Vnd alle die da rüerten ahn,

Wordten gesundt, weiber vnd Mann.

⇨ Capitel 15